بھارتی ریاست گجرات میں قانون ساز اسمبلی کے انتخابات میں بھارتیہ جنتا پارٹی نے 182 میں سے 156 نشستیں جیت لی ہیں۔ گجرات میں کانگریس کو سب سے زیادہ نقصان پہنچا ہے۔ کانگریس 17 سیٹوں پر سمٹ گئی ہے۔

عام آدمی پارٹی نے گجرات میں اپنا کھاتہ کھول لیا ہے۔ اس کا ووٹ شیئر بڑھ گیا ہے اور اس نے پانچ سیٹیں جیتی ہیں۔

گجرات میں 2017 کے آخری اسمبلی انتخابات میں بھارتیہ جنتا پارٹی کو 99 سیٹیں ملی تھیں، کانگریس نے 77 سیٹیں جیتی تھیں۔

ہماچل پردیش اسمبلی انتخابات میں کانگریس ایک بڑی پارٹی بن کر ابھری ہے۔ اس نے 68 میں سے 40 سیٹیں جیتی ہیں۔ دوسری جانب بھارتیہ جنتا پارٹی نے 25 اور تین سیٹوں پر دیگر امیدواروں نے کامیابی حاصل کی ہے۔

گزشتہ تین دہائیوں سے ہماچل پردیش کی تاریخ رہی ہے کہ یہاں کسی ایک پارٹی کو لگاتار دوسری بار اقتدار نہیں ملا۔ تاہم ہماچل پردیش میں بھارتیہ جنتا پارٹی کے ووٹ شیئر پر زیادہ اثر نہیں ہوا۔ بھارتیہ جنتا پارٹی کا ووٹ فیصد 43 فیصد تھا، جب کہ کانگریس کا ووٹ فیصد تھوڑا زیادہ 43.9 فیصد تھا۔

عام آدمی پارٹی نے چند روز قبل دہلی میں ہونے والے بلدیاتی انتخابات میں 15 سال سے اقتدار میں رہنے والی بھارتیہ جنتا پارٹی کو شکست دی۔ عام آدمی پارٹی نے 250 میں سے 134 وارڈوں پر کامیابی حاصل کی، جب کہ بھارتیہ جنتا پارٹی نے 104 اور کانگریس نے صرف نو پر کامیابی حاصل کی۔

(Click here for Android APP of IBTN. You can follow us on facebook and Twitter)

Share This News

About sharing